नाले बन्दुक चलाउने प्रहरी अत्याधुनिक पेस्तोलबारे बेखबर रहेको दुर्गा प्रसाईंको आरोप

विवादास्पद व्यवसायी दुर्गा प्रसाईंको हिजो फेला परेको पेस्तोलको मोडल र लाइसेन्समा लेखिएको विवरण फरक परेको छ । प्रहरीका अनुसार लाइसेन्समा उल्लेख भएको पेस्तोलको मोडल र बरामद हतियार फरक रहेकाले हिरासतमा रहेका उनका अंगरक्षकहरु दिपक खड्का र रामकुमार धिमाललाई छाड्न नमिल्ने प्रहरीले बताइसकेको छ । 

आज साँझसम्म उनीहरुलाई हिरासतमुक्त नगराए कानुनी उपचारको निम्ति  अदालत जाने बताइएकाे थियाे । खड्का र धिमालकाे परिवारले आज सर्वोच्च अदालत गुहारेका छन् । सरकारले नै हतियारको लाइसेन्स दिएको र आफैँले पक्राउ गरेको प्रसाईंको आरोप छ । 

‘विगत छ वर्षदेखि आफ्नो साथमा रहेको हतियारले हिजो अचानक के गर्यो ?,’ उनले प्रश्न गरेका छन् । भनेका छन्, ‘मलाई मार्न सुपारी दिइएको खबर पाएको छु, मेरो ज्यान खतरामा छ, दुई जना सुरक्षाकर्मी दिनुपर्यो भनेर मैले झापा सिडिओ कार्यालयमा निवेदन दिएको थिएँ । नपाएपछि आफैं भए पनि सुरक्षित रहन मैले हतियारको लाइसेन्स बनाएको हुँ ।’ 

उनले सोही सन्दर्भमा प्रहरी संगठनलाई नै व्यङ्ग्य गरेका छन् । अहिलेसम्म नाले बन्दुक र खेलौनाजस्तो पेस्तोल चलाएका प्रहरीलाई आफ्नो अत्याधुनिक हतियारबारे केही थाहा नभएको उनको तर्क छ । पेस्तोलको बखान गर्दै उनले भनेका छन्, ‘जर्मनीबाट मगाएको उक्त पेस्तोलको मूल्य लगभग २२ लाख पर्यो । एकै पटकमा ३६ राउण्ड गोली लोड हुन्छ । मसँग दुई सय राउन्ड गोली छ । हिजो केटाहरुले सय राउन्ड गोली मात्रै बोकेका थिए ।’