रिटर्नी सेन्टरको सम्मेलन भरतपुरमा,प्रधानमन्त्री प्रमुख अतिथि

नेकपा माओवादी केन्द्रनिकट २४ औं भ्रातृ संगठन रिटर्नी सेन्टर, नेपालको प्रथम राष्ट्रिय सम्मेलन हुने भएको छ । वैदेशिक रोजगारीबाट फर्किएकाहरुले गठन गरेको संगठनको प्रथम राष्ट्रिय सम्मेलन आगामी शुक्रबार र शनिबार आयोजना गर्न लागिएको छ । 

सम्मेलनको उद्घाटन प्रधानमन्त्री तथा पार्टी अध्यक्ष पुष्पकमल दाहाल (प्रचण्ड) ले गर्नुहुने बताइएको छ । चितवनको भरतपुरमा सम्मेलन हुने सेन्टरको उपसंयोजक हेमन्त पौडेलले बताए । ‘एक रिटर्नी, एक उद्यम प्रविधिको माध्यम’ भन्ने मूल नारासहित हुन लागेको सम्मेलनमा कृषि तथा डिजिटल प्रविधिबारे जानकारी दिइने उनको भनाइ छ ।

 

सम्मेलनले विदेशमा सिकेको ज्ञान, सीप, प्रविधि र आर्जन गरेको पूँजीलाई प्रयोग गरेर मुलुकमा उत्पादन बढाउन र रोजगारी सिर्जना गर्न सहयोग पुर्याउने विश्वास गरिएको छ । राष्ट्रिय सम्मेलनका लागि सेन्टरले यसअघि स्थानीय, जिल्ला र प्रदेशस्तरीय सम्मेलनको आयोजना गरेको थियो ।