प्रधानमन्त्री प्रचण्ड भेट्न आईसीसी अध्यक्ष वालुवाटारमा

नेपाल भ्रमणमा रहेका क्रिकेटको सर्वोच्च संस्था आईसीसीका अध्यक्ष ग्रेग बार्कले प्रधानमन्त्री पुष्पकमल दाहाल प्रचण्डसँग भेटवार्ता गरेका छन् । 

वालुवाटारस्थित प्रधानमन्त्री निवासमा अपराह्न भएको भेटमा नेपालको क्रिकेट विकासका सन्दर्भमा छलफल भएको प्रधानमन्त्रीको सचिवालयले जानकारी दिएको छ । सो क्रममा प्रधानमन्त्री प्रचण्डले आईसीसी अध्यक्षको नेपाल भ्रमण नेपाली क्रिकेट क्षेत्रका महत्वपूर्ण हुने विश्वास व्यक्त गर्नुभयो । 

सरकारले क्रिकेट रंगशालालाई राष्ट्रिय गौरवको आयोजनाको रुपमा प्राथमिकतामा राखेर निर्माण गर्ने निर्णय गरेको जानकारी गराइएको छ । 

उहाँले भन्नुभयो,‘नेपाल सरकारले क्रिकेट पूर्वाधारलाई निकै प्राथमिकता दिएको छ । क्रिकेट रंगशालालाई राष्ट्रिय गौरवको आयोजनाको रुपमा निर्माण गर्ने निर्णय भएको छ । सन् २०२७ को यु–१९ वुमन वर्ल्ड कपलाई पनि सरकारले निकै महत्व दिएको छ । यसमा आईसीसीबाट पनि महत्वपूर्ण सहयोग हुने अपेक्षा गरेका छौं ।’

त्यस्तै, अध्यक्ष बार्कले नेपाली क्रिकेटको विकासका लागि आईसीसीले सक्दो सहयोग गर्ने प्रतिबद्धता जनाउनुभएको छ । भेटमा मुख्यसचिव डा. वैकुण्ठ अर्याल, नेपाल क्रिकेट संघका पदाधिकारीलगायतको उपस्थिति थियो । 

आइसीसीका अध्यक्ष वार्क चारदिने भ्रमणका लागि सोमबार नेपाल आइपुगेका हुन् ।