बहालवाल मुख्यमन्त्री समातिएको घटनाले भारतमा हङ्गामा, मोदी सरकारको चर्को आलोचना

भ्रष्टाचारको आरोपमा हिजो साँझ पक्राउ परेका दिल्लीका मुख्यमन्त्री अरविन्द केजरिवाललाई आज पिएमएलए अदालतमा पेश गरिदैछ । सर्वोच्च अदालत पुर्याइनुअघि प्रवर्तन निर्देशनालय (ईडी)ले साढे २ बजे पिएमएलए अदालत लैजान लागेको हो । 

बुझ्नैपर्ने कुरा के छ भने प्रवर्तन निर्देशनालय (इडी), कानून कार्यान्वयन गराउने भारतको सरकारी निकाय हो । पिएमएलए मनी लान्ड्रिङसँग सम्मन्धित मुद्धा हेर्ने अदालत हो । 

पिएमएलए अदालतको सुनुवाईपछि केजरीवाललाई सर्वोच्च अदालतमा पेश गरिने जनाइएको छ । त्यहाँ उनको पक्राउविरुद्धको मुद्धा न्यायाधीश संजिव खन्ना, वेला एम त्रिवेदी र एम एम सुंदरेशको संयुक्त इजालासमा सुनुवाई हुनेछ । 

आम आदमी पार्टीका नेता तथा मुख्यमन्त्री केजरीवालमाथि सन् २०२१ मा मदिरा नीति बनाउँदा एक अर्ब ४० करोड अनियमितता गरेको आरोप छ । हिजो पक्राउ पर्नुअघि पनि उनले तीनपटक इडीलाई बयान दिइसकेका थिए । बयानमा उनले आर्थिक अनियमिततामा आफ्नो कुनै संग्लनता नभएको र राजनीतिक निर्देशनकै आधारमा दु:ख नदिन आग्रह गरेका थिए । 

हिजो साँझ दुई घण्टामा के-के भयो ? 

इडीको टिम ९ वटा गाडी लिएर साँझ ७ बजे केजरीवालको घर पुगेको थियो । साढे ७ बजे आम आदमी पार्टीका प्रभावशाली नेता सौरभ भारद्धाज पनि त्यहाँ पुगेका थिए । तर, उनलाई बाहिरै रोकियो । त्यसपछि उनले केजरीवालको घरमा भइरहेको गतिविधिबारे सूचना सार्वजनिक गरे । 

८ बजे आम आदमीकै अर्का प्रभावशाली नेता राघव चड्डाले केजरीवाललाई पक्राउ गर्ने राजनीतिक षड्यन्त्र भइरहेको भन्दै सामाजिक सञ्जालमार्फत जानकारी गराए । त्यसको १० मीनेटपछि इडीको टिमले केजरीवालको मोबाइल पनि जफत गर्यो, त्यसबेलासम्म सामाजिक सञ्जालमा समचार फैलिसकेको थियो । मोबाइलमा लगातार फोन आइरहेको थियो । 

सवा ८ बजे घर बाहिर आम पार्टीका कार्यकर्ता जम्मा भएर नारावाजी सुरु गरे । साढे ८ बजे केजरीवालको घरबाहिर इडीका सुरक्षाकर्मी र कार्यकर्ताबीच झडप हुँदा स्थिति तनावग्रस्त भएको थियो ।  त्यसपछि पौने ९ बजे थप सुरक्षाकर्मी बोलाइयो र नारावाजीमा संलग्न सबैलाई पक्राऊ परे । त्यसक्रममा ४० भन्दा बढी कार्यकर्ता पक्राउ परेको समाचारहरुमा जनाइएको छ । 

त्यसको केही मीनेटमै केजरीवाललाई पक्राउ गरेर घरबाहिर ल्याइएको थियो । हिजो रातभर इडीकै हिरासतमै बिताएका उनको स्वास्थ्यमा समस्या देखिएको बताइएको छ । उनलाई अदालत पेश गर्नुअघि आरआरएम अस्पतालका स्वास्थ्यकर्मीले चेकजाँच गर्दैछन् । 

यता, उनका समर्थक र आम पार्टीका कार्यकर्ताहरुले रिहाइको माग गर्दै विरोध प्रदर्शन गरिरहेका छन् । प्रहरीले प्रदर्शनमा उत्रिएका दिल्ली सरकारका मन्त्री सौरभ भारद्वाजलगायत आम आदमी पार्टीका नेता/कार्यकर्तालाई पक्राउ गरेको छ । 

केजरीवालको गिरफ्तारीलाई विश्लेषकहरुले राजनीतिक दृष्टिकोणबाट पनि हेर्न थालेका छन् । तेस्रो पटक प्रधानमन्त्रीको दौडमा रहेका नरेन्द्र मोदीको कटु आलोचक केजरीवाललाई लोकसभा निर्वाचनको संघारमा पक्राऊ गरेर सरकारले विपक्षीलाई तर्साउने रणनीति बनाइएको टिप्पणी भैरहेको छ । कांग्रेस (आई) लगायत विपक्षीहरुले प्रधानमन्त्री मोदी र भारतीय जनता पार्टीको चर्को आलोचना गरिरहेका छन् । 

कतिपयले मुख्यमन्त्री केजरीवाल स्वयं मदिराविरुद्ध रहेको अन्तर्वार्ता दिइरहेका छन् । अन्ना हजारेले भनेका छन्, 'मलाई दुःख लाग्यो मदिरा विरोधी मान्छेले नै मदिरा नीतिमा भ्रष्टाचार गर्यो भन्दा ! यो घटना शुद्ध छैन । यहाँ षड्यन्त्र पक्कै छ ।'

यस घटनालाई लिएर पश्चिमा मिडियाहरुले पनि मोदी सरकारको आलोचना गरिरहेका छन् ।