प्रधानमन्त्रीले गोरखामा 'क्वार्ज क्रिष्टल' प्रतिस्थापन गर्ने

प्रधानमन्त्री पुष्पकमल दाहाल प्रचण्ड भोलि गोरखा जानुहुने भएको छ । पुरातात्विक र ऐतिहासिक महत्वको बहुमूल्य ढुंगा ‘क्वार्ज क्रिष्टल’ प्रतिस्थापन कार्यक्रममा सहभागी हुन उहाँ त्यता जान लाग्नुभएको हो । 

प्रधानमन्त्री बिहान ११ बजे गोरखा दरबार आउने कार्यक्रम रहेको गोरखा नगरपालिकाका मेयर कृष्णबहादुर रानामगरले जानकारी दिनुभयो । उहाँका अनुसार बिहान १० बजेदेखि कार्यक्रम शुरु हुनेछ । 

कार्यक्रममा प्रदेशका सांसद्, गोरखाका विभिन्न पालिकाका मेयर, उपमेयर, जिल्लास्थित राजनीतिक दलका प्रतिनिधि सहभागी हुनेछन् ।

गत असारमा वडा नम्बर ७, सतिपिपलस्थित एक घरबाट टल्कने ढुंगा अर्थात ‘क्वार्ज क्रिष्टल’ फेला परेको थियो । जिल्लाबासीले सो ढुंगाको व्यवस्थापन जिल्लाभित्रै गर्नुपर्ने माग राखेपछि गत फागुनमा जिल्ला प्रशासन कार्यालय, गोरखामा बसेको सर्वदलीय बैठकले गोरखा दरबार परिसरमा प्रतिस्थापन गर्ने निर्णय गरेको हो ।