गृहमन्त्रीविरुद्धको मोर्चा फराकिलो हुँदै, महन्थ ठाकुर पनि विपक्षमा

सहकारी ठगी प्रकरणमा नाम जोडिएका गृहमन्त्री रवि लामिछानेमाथि छानबिन गर्न संसदीय समिति गठनको माग गर्ने विपक्षी दलको संख्या थपिन थालेको छ । 

हिजोसम्म प्रमुख प्रतिपक्ष नेपाली काँग्रेसले उठाउँदै आएको उक्त मागको पक्षमा आजदेखि राप्रपा र लोसपा पनि सहमत भएका हुन् । प्रतिनिधिसभाको आजको बैठकमा काँग्रेससंगै यी दुई दलका सांसदहरुले पनि छानबिन समिति गठनको माग राखेका छन् ।

लोसपाका सांसद रामप्रकाश चौधरीले सहकारीबाट धेरै नागरिक पीडित भएकाले तत्काल संसदीय छानबिन समिति गठन गर्नुपर्ने पक्षमा आफ्नो पार्टी स्पष्ट रहेको बताए । २०७५ सालमा गोरे भन्ने व्यक्तिको नेतृत्वमा भएको ३८ किलो सुन तस्करी प्रकरणको छानबिन समितिले दिएको प्रतिवेदन सार्वजनिक गर्न पनि उनले माग गरे । 

त्यस्तै, सुन तस्करी प्रकरणमा जाँचबुझ आयोगको प्रतिवेदन हालसम्म सार्वजनिक नगरिएकोमा उनले असन्तुष्टि जनाएका छन् । संसदीय छानबिन हुने तर प्रतिवेदन सार्वजनिक नगर्ने भए त्यस्ता समितिको कुनै औचित्य नहुने सांसद चौधरीको भनाई छ । 

त्यसअघि बोल्ने राप्रपाका सांसद ज्ञानबहादुर (ज्ञानेन्द्र शाही) ले पनि छानबिन समिति गठन गर्न माग गरे । सत्तापक्षकै सांसद राजेन्द्रप्रसाद पाण्डेले समेत घुमाउरो भाषामा आफूलाई संसदीय समिति गठनको पक्षमा उभ्याए । उनले काँग्रेससँग अर्थपूर्ण र सार्थक सहमति गरेर सदनको अवरोध हटाउन सरकारको ध्यानाकर्षण गराएका थिए ।  

तर, सत्ता पक्ष भने अहिलेसम्म संसदीय समिति बनाउन तयार भैसकेको छैन । जसका कारण केही दिनयता संसद बैठक प्रभावित हुँदै आएको छ ।आज पनि आकस्मिक समयको कार्यक्रम सकिएलगत्तै विपक्षी वेञ्चका सांसदहरुले उठेर विरोध जनाएका थिए । सभामुख देवराज घिमिरेले सभालाई निर्धारित कार्यसूचीमा प्रवेश गराउन खोज्दा काँग्रेस, राप्रपा र लोसपाका सांसदहरु आ–आफ्नो स्थानमा उठेर विरोध जनाएका थिए । 

सभामुखले बारम्बार आग्रह गर्दा पनि सांसदहरुले अवरोध जारी राखेपछि वैशाख २ गते ११ बजेसम्मका लागि बैठक स्थगित गरिएको छ ।प्रतिनिधिसभाको हिजोको बैठकमा पनि काँग्रेस सांसदहरुले अवरोध गरेपछि निर्धारित कार्यसूचीमा प्रवेश नगरी स्थगित भएको थियो । हिजो राप्रपा र लोसपाका सांसदहरु उठेका थिएनन् ।