‘लिङ्ग काटेर फाल्न तयार’ बाबा अदालतमा झिकाइँदै

सिद्धबाबाको नामले चिनिने कृष्णबहादुर गिरीविरुद्धको जबरजस्ती करणी मुद्दामा उच्च अदालत विराटनगरले प्रत्यर्थी (प्रतिवादी) झिकाउन आदेश दिएको छ । न्यायाधीश श्रीधराकुमारी पुडासैनी र नरेशकुमार चौधरीको इजलासले उक्त आदेश गरेको हो ।

जिल्ला अदालत सुनसरीले गिरीलाई सफाइ दिएपछि उच्च सरकारी वकिल कार्यालयले उच्च अदालत विराटनगरमा गरेको पुनरावेदनमाथि सुनुवाई गर्दै प्रत्यर्थी झिकाउन भनिएको हो । २०७६ कात्तिक ४ गते राति सुनसरीको चतरास्थित आश्रममा आफूलाई जबर्जस्ती करणी गरेको दाबीसहित महिला अनुयायीले प्रहरीमा जाहेरी दिएकी थिइन् । जिल्ला अदालत सुनसरीले २०७७ मंसिर २२ गते र २०८० भदौ २७ गते  गिरीलाई सफाइ दियो । 

उच्च अदालत विराटनगरले पुनः प्रमाण बुझेर फैसला गर्न जिल्ला अदालतलाई आदेश दिएपछि २०८० भदौ २७ गते जिल्ला अदालतका न्यायाधीश हरिप्रसाद कोइरालाको इजलासले उनलाई सफाइ दिएको थियो । जिल्लाको फैसलाको पूर्णपाठमा महिला र गिरीबीच भएको वार्तामा आवाज मिले पनि परीक्षण गर्ने नेपाल प्रहरीका कर्मचारीले कुनै विश्वविद्यालयबाट डिग्री नलिएकाले अडियोको विश्वसनीयतामा प्रश्न उठेकाले त्यसलाई प्रमाणको रुपमा ग्रहण गर्न नमिल्ने आधारमा सफाई दिइएको उल्लेख छ ।

गिरीले विराट नर्सिङहोमबाट महिलालाई फोन गर्दै ‘अब त्यस्तो हुँदैन,त्यस्तो भयो भने लिङ्ग काटेर फालिदिन्छु’ भन्दै माफी मागेको अडियो सार्वजनिक भएको थियो । अदालतमा बकपत्र गर्दा परीक्षण गर्ने प्रहरी अधिकृतले अडियो परीक्षणको तालिम लिएको तर आफूले कुनै विश्वविद्यालयबाट अडियो अनुसन्धानमा विशेष शिक्षा नलिएको बयान दिए । सोही आधारमा सिद्धबाबाले सफाई पाए तर अहिले उनीविरुद्धको जबरजस्ती करणी मुद्दामा उच्च अदालत विराटनगरले अस्ति प्रत्यर्थी झिकाउने आदेश दिएको हो ।

याे पनि...

'सहमति' मा करणी ठहर,तिनै बाबाको निवासमा महिला डेपुटी गभर्नर