८ कक्षाकाे नतिजामा नगरपालिकाका हाकिमको चलखेल
बाँकेको कोहलपुर नगरपालिकाको शिक्षा शाखाद्वारा सञ्चालित कक्षा ८ को नतिजा प्रकाशनमा चलखेल भएको पाइएको छ । शाखाका प्रमुखसहितको संलग्नतामा अनियमितता भएको तथ्य खुलेको छ ।
नगरपालिकाले गठन गरेको छानबिन समितिले उक्त खुलासा गरेको छ । अनियमितता गर्नेमाथि कारबाहीको प्रक्रिया अगाडि बढाइएको नगरपालिकाले जनाएको छ । योसँगै नतिजा प्रकाशनमा चलखेल गर्ने कर्मचारी, निजी विद्यालयका सञ्चालक, शिक्षकहरु कारबाहीमा पर्ने बताइएको छ ।
शिक्षा शाखाका प्रमुख रामबहादुर हमाल, परीक्षा शाखा अधिकृत रविलाल मिजारसहितका कर्मचारीलाई कारबाही गरिने नगरपालिकाले जनाएको छ । नगरपालिकाका अनुसार उनीहरुले मिलेमतोमा नतिजामा गडबडी गरेको पाइएको हो ।
उनीहरुमाथि कारबाहीको प्रक्रिया अगाडि बढिसकेको नगरप्रमुख पूर्णप्रसाद आचार्यले बताए । समितिले अस्ति सोमबार छानबिन तथा जाँचबुझ समितिको प्रतिवेदन सार्वजनिक गरेको थियो । प्रतिवेदन सार्वजनिकरणमा नगरप्रमुख आचार्यसहित उपप्रमुख संगीता सुवेदी, प्रमुख प्रशासकीय अधिकृत धोलकराज ढकाललगायत उपस्थित थिए ।
नगरपालिकाले गत चैत २ देखि ९ गतेसम्म आठ कक्षाको परीक्षा सञ्चालन गरेको थियो । परीक्षामा सहभागी हुन सामुदायिक र संस्थागत गरी ५२ वटा विद्यालयका दुई हजार ८६४ विद्यार्थीले फारम भरेका थिए । गत चैत २३ गते परीक्षाको नतिजा सार्वजनिक गरियो ।
एक हजार ७८ विद्यार्थी उत्तीर्ण भएकामध्ये संस्थागततर्फ ६९ दशमलव ८७ र सामुदायिकतर्फ १४ दशमलव ८० प्रतिशत रहेको बताइएको छ । उक्त नतिजाप्रति असन्तुष्टि जनाउँदै विद्यार्थीले सार्वजनिक रुपमै विरोध जनाएका थिए ।
त्यसपछि नगरपालिकाले गत चैत २५ गते वडा नम्बर १२ का वडाध्यक्ष वीरेन्द्रबहादुर शाहको संयोजकत्वमा पाँच सदस्यीय जाँचबुझ एवम् छानबिन समिति गठन गरेको हो । सदस्यमा नेपाल शिक्षक महासंघ, कोहलपुरका प्रतिनिधि रामप्रसाद आचार्य, क्रिसा कोहलपुरका प्रतिनिधि बिएल भारती, ज्ञानज्योति मावि चप्परगौडीका प्रधानाध्यापक सुमित्रा न्यौपाने र सदस्य सचिवको रुपमा नगर प्रहरी प्रमुख वीरबहादुर थापा थिए ।
उक्त समितिले १३ दिन लगाएर प्रतिवेदन तयार पारेको हो । वैशाख ७ गते प्रतिवेदन बुझाइएको छ । समितिले दिएका तथ्यहरु, छानबिनका क्रममा भेटिएका त्रुटिसहित प्राप्त रायको आधारमा नगरपालिकाको बोर्ड बैठकले अनियमिततामा संलग्न व्यक्तिहरुलाई कारबाही गर्ने निर्णय गरेको हो ।
त्यसैगरी, कोहलपुर सिटी एकेडेमीका सञ्चालक प्रशान्त रिजाल, शिक्षक डम्बरबहादुर खत्री, पञ्चमुखी इङ्गलिस मिडियम स्कुलकी शिक्षिका आशा देवकोटा र रबिन बम, ब्राइट लाइट एकेडेमीका शिक्षक कुवर ढकाल, वेष्टर्न इङ्गलिस मिडियम सेकेण्डरी स्कुलका शिक्षक उमेश केसीले प्रचलित कानुन, शिक्षा ऐन र नियमावलीविपरीत काम गरेको प्रतिवेदनमा उल्लेख छ ।
प्रतिवेदनमा एकेडेमीका सञ्चालक रिजालको निर्देशन र नगरपालिकाको परीक्षा शाखा प्रमुखको मिलेमतोमा नगर शिक्षा शाखाबाट आफ्नो विद्यालयका चार जना विद्यार्थीको छ थान उत्तरपुस्तिका लगेको भनिएको छ । उक्त सक्कल उत्तरपुस्तिका हटाएर नक्कली उत्तरपुस्तिका तयार पारिएको समितिको ठहर छ ।
यस कार्यमा एकेडेमीका रिजालसहित आभासविक्रम क्षेत्री, शिक्षण सहजकर्ता रोमिना खत्री, बालविकास शिक्षिका राधिका मल्ल, तारा चन्द, कोहलपुर सिटीका शिक्षक हिरा केसीलगायत दोषी देखिएका छन् ।
ट्रेन्डिङ पोस्ट
टिप्पणीहरू