किर्ते कन्सल्टेन्सीबाट साढे दुई करोड ठगि, कुवेतको आश देखाएर भारतमा यौनशोषण

जापान पठाइदिने प्रलोभनमा पारेर सर्वसाधारण ठग्ने दुई जना पक्राउ परेका छन् । काठमाडौं उपत्यका अपराध अनुसन्धान कार्यालयले आज पत्रकार सम्मेलन गर्दै उनीहरुलाई सार्वजनिक गरेको हो । 

पक्राउ पर्नेमा रामेछापको लिखु तामाकोशी गाउँपालिका–७, का नारायणबहादुर राई भन्ने ३५ वर्षीय राजन श्रेष्ठ र झापाको गौरीदह नगरपालिका–१, का पर्वराज पाण्डे भन्ने ४६ वर्षीय ईश्वरी पाण्डे रहेका छन् । उनीहरुले अर्काको नागरिकता दुरुपयोग गरी अरुकै नाममा कन्सलटेन्सी दर्ता गरेर ठगी गर्ने गरेको पाइएको प्रहरीले जनाएको छ । 

प्रहरीका अनुसार श्रेष्ठले नारायणबहादुर राईको नाममा सानिमा विकास बैंकमा खाता खोलेका थिए । खाता खोल्दा केवाइसी फर्ममा आफ्नो फोटो राखेपनि नागरिकता भने उनले नारायणबहादुरको बुझाएका थिए । तर, बैंकले भेरिफाइ नगरी खाता खोलिदिएको पनि खुलेको छ । 

उक्त खातामा विदेश जान चाहने मानिसहरुलाई उनले रकम जम्मा गर्न लगाई पछि आफ्नो खातामा सार्ने गरेको देखिएको छ । आफ्नो खातामा धेरै रकम जम्मा भएपछि श्रेष्ठले चलाखी गरि पीडितहरुलाई कामना सेवा विकास बैंकमा पर्वराज नाममा खोलिएको खातामा रकम जम्मा गर्न लगाएको खुल्न आएको प्रहरीले जनाएको छ । 

प्रहरीका अनुसार श्रेष्ठ र पाण्डेले दुई सय १९ जनाबाट दुई करोड ६८ लाख रुपैयाँ ठगी गरेको पाइएको छ । 

प्रहरीले वास्तविक नारायणबहादुर राईलाई सम्पर्कमा ल्याई सोधपुछ गर्दा उनी पठाओ चालक रहेको र १५-१६ वर्षअघि नै नागरिकता हराएको थाहा भएको छ । पक्राउ परेका दुवैलाई आवश्यक कारबाहीका निम्ति वैदेशिक रोजगार विभाग पठाएको उपत्यका अपराध अनुसन्धान कार्यालयका प्रमुख एसएसपी सानुराम भट्टराईले जानकारी दिए । 

यता, वैदेशिक रोजगारीका लागि कुवेत पठाइदिने प्रलोभनमा परेकी एक महिला भारतमा बेचिएकी छन् । दाङको बबई गाउँपालिका–५, का ४५ वर्षीय पूर्णबहादुर भण्डारीले महिलालाई भारतको नयाँदिल्ली पुर्याई जबरजस्ती वेश्यावृत्तिमा लगाएको थाहा भएको हो । 

प्रहरीका अनुसार भण्डारीले कुवेतमा राम्रो आम्दानी हुने र त्यहाँ जान लाग्ने सम्पूर्ण खर्च आफैंले व्यहोरिदिने विश्वास दिलाई पीडित महिलालाई बुटवल हुँदै भारतको नयाँदिल्ली पुर्याएका थिए । त्यसपछि त्यहाँ रहेको फ्ल्याटमा राखेर बन्धक बनाई यौन शोषण गर्नुका साथै अन्य भारतीय नागरिकलाई समेत ल्याएर जबर्जस्ति वेश्यावृत्तिमा लगाएको अनुसन्धानबाट खुलेको हो । 

गत असार १३ गते त्यहाँबाट भागेर नेपाल फर्किएपछि पीडितले प्रहरीको मानव बेचविखन ब्युरोमा जाहेरी दिएकी थिइन् । आरोपित भण्डारीको खोजतलास गर्ने क्रममा उनलाई अस्ति बबई गाउँपालिका–५, स्थितबाट नियन्त्रणमा लिइएको प्रहरीले जनाएको छ । 

उनीमाथि मानव बेचबिखन तथा ओसारपसार कसूरमा जिल्ला अदालत काठमाडौंबाट पाँच दिनको म्याद थप गरी आवश्यक अनुसन्धान भइरहेको जनाइएको छ ।