सिधा कुरा डटकमका स्रोतलाई हिजो प्रहरी हिरासत, आज साधारण तारेख

सर्वोच्च अदालतले ‘सिधा कुरा डटकम’ का प्रकाशक युवराज कँडेल, सम्पादक नवीन ढुंगाना र स्टिङ अपरेशनकर्ता राजकुमार तिमिल्सिनालाई साधारण तारिखमा छाडेको छ । न्यायाधीशद्वय हरिप्रसाद फुँयाल र महेश शर्मा पौडेलको संयुक्त इजलासले उनीहरुलाई साधारण तारिखमा छाड्न आदेश दिएको हो । 

त्यस्तै, सर्वोच्चले अडियोमा नाम लिइएका कान्तिपुर मिडिया ग्रुपका अध्यक्ष कैलाश सिरोहिया, अन्नपूर्ण मिडिया नेटवर्कका अध्यक्ष रामेश्वर थापा, पत्रकार सुरेन्द्र काफ्लेसहित अधिवक्ता हरि उप्रेती, किशोर विष्ट, किशोरकुमार विष्ट र प्रहरी उपरीक्षक (एसपी) सञ्जय थापासँग लिखित जवाफ माग गरेको छ । 

उक्त मुद्दाको अर्को पेसी जेठ ४ गतेका लागि तोकिएको सर्वोच्चले जनाएको छ । उपप्रधान तथा गृहमन्त्री रवि लामिछाने र जिबी राईको सुनौलो परियोजना ‘ग्यालेक्सी फोर के’ मा प्रसारित सिधा कुरा कार्यक्रमको अनलाइन संस्करण ‘सिधा कुरा डटकम’ ले ‘द डार्क फाइल’ नामक कार्यक्रमबाट शंकास्पद अडियो सार्वजनिक गरेको थियो । 

‘चार सय बढी भ्रष्टाचारका मुद्दा डिसमिस गराउने सर्वोच्च अदालतका न्यायाधीश सहभागी बैठकको स्टिङ अपरेशन’ शीर्षकको समाचार सामग्रीमा उठाइएको विषयवस्तु कपोकल्पित र भ्रामक भएको भन्दै सर्वोच्चका उपरजिष्ट्रार गोविन्दप्रसाद घिमिरेले सर्वोच्चमा अदालतको अवहेलना मुद्दा दायर गरेका थिए । सोही मुद्दामाथि भएको सुनुवाईपछि सर्वोच्चले आज उक्त आदेश दिएको हो ।