सहकारी ठगीपछि फरार जीबी राईको पासपोर्ट रद्धको प्रक्रिया शुरु

सहकारी ठगी प्रकरणमा फरार जीबी राईको पासपोर्ट रद्ध गर्न राहदानी विभागलाई पत्राचार गरिएको छ । पोखरास्थित सूर्यदर्शन सहकारीका संस्थापक अध्यक्ष एवम् संरक्षकसमेत रहेका उनको राहदानी रद्धका लागि जिल्ला प्रहरी कार्यालय, कास्कीले विभागलाई पत्राचार गरेको छ । 

राहदानी विभागका प्रवक्ता रमेशकुमार चर्मकारले राईको राहदानी रद्ध गर्न पत्र प्राप्त भएको जानकारी दिएका छन् । उनले भने, ‘हिजो पत्र आएको हो । अब हामी आवश्यक अध्ययन गरेर प्रक्रिया अघि बढाउँछौं ।’ 

उनका अनुसार राईको पासपोर्ट यसअघि नै रोक्का गरिसकिएको छ । विभागले उनको राहदानी रद्ध गरिएको लेखेर मात्र पठाउन बाँकी रहेको चर्मकारले बताए । ‘यसअघि नै उनको पासपोर्ट रोक्का गरिएको हो । अब राहदानी नै रद्ध गरिएको लेखेर पठाउन मात्र बाँकी छ,’ उनले भने । 

मुलुकभर सहकारी नेटवर्किङ खडा गरी बचतकर्ताको अर्बौ रकम हिनामिना गरेर फरार भएका जीबी राईलाई पक्राउ गर्न यसअघि नै प्रहरीले इन्टरपोलमार्फत डिफ्युजन र रेड नोटिस जारी गरिसकेको छ । 

मलेसियामा लुकेर बसेका भनिएका उनलाई पक्राउ गरेर स्वदेश पठाइदिन प्रहरी प्रधान कार्यालयको अनुरोधमा केही समयअघि परराष्ट्र मन्त्रालयले समेत मलेसिया सरकारलाई ‘कुटनीतिक नोट’ पठाएको थियो । यद्यपि, उनी हालसम्म पक्राउ परेका छैनन् ।