एचआईभी संक्रमित महिलाको पेटभित्र तीन पाउ कोकिन, भारतीय महिला पनि पक्राउ

सात करोड मूल्य बराबरको लागुऔषधसहित दुई विदेशी महिला पक्राउ परेका छन् । इथियोपियाबाट नेपाल आएका युगाण्डाका केभिना मुगाला र लिलियन सुशान वानयेन्जेलाई प्रहरीले सिनामंगलमा नियन्त्रणमा लिइएको बताइएको छ ।

मुगालाको पेटबाट एक केजी २६० ग्राम कोकिन बरामद गरिएको छ । उनले ९० वटा कोकिनका क्याप्सुल निलेर काठमाडौँ उत्रिएकी थिइन् । उनी एचआईभी सङ्क्रमित समेत रहेको प्रहरीको अनुसन्धानबाट खुलेको छ । 

यस्तै लिलियनले चकलेटको खोलमा लुकाएर ल्याएको एक केजी ३९४ ग्राम कोकिन बरामद भएको छ । उनले पनि चकलेटमा ६३ वटा कोकिनको क्याप्सुल लुकाएर ल्याएकी थिइन् । 

दुई जनाबाट बरामद भएको २ केजी ६५४ ग्राम कोकिनको मूल्य नेपाली बजारमा ७ करोड ९६ लाख रहेको लागुऔषध नियन्त्रण ब्युरोका एसएसपी गोविन्द थपलियाले जानकारी दिए । उनका अनुसार उक्त कोकिन लिन भारतबाट नेपाल आएकी ३३ वर्षीया देवाजनी पाललाईसमेत नियन्त्रणमा लिइएको छ । 

पक्राउ परेका तीनै जनामाथि थप अनुसन्धान भइरहेको प्रहरीले जनाएको छ ।