नेविसंघद्वारा केपी ओलीको निन्दा, सभामुख पक्षपाती भएको ठहर

नेपाली काँग्रेसको भातृ संगठन नेविसंघले सभामुख देवराज घिमिरेले पक्षपाती व्यवहार गरेर संसदीय व्यवस्थामाथि प्रहार गरेको आरोप लगाएको छ । 

संसदमा प्रतिपक्षी दलको विरोध जारी रहँदा सभामुखले जबरजस्ती सदन चलाउन खोजेर संसदीय मर्यादाविपरीतको कार्य गरेको नेविसंघले जनाएको छ । प्रवक्ता सुरज सैजुवालले आज विज्ञप्ति जारी गर्दै सभामुखका कारण प्रतिनिधिसभाको बैठकमा मुठभेडको अवस्था सिर्जना भएको बताए । 

त्यस्तै, कांग्रेस उपसभापति एवं सांसद धनराज गुरुङ्गले नारा लगाइरहँदा नेकपा एमालेका अध्यक्ष केपी शर्मा ओलीबाट भएको व्यवहारको नेविसंघले निन्दा गरेको छ ।

‘नेपाल विद्यार्थी संघका पूर्वअध्यक्ष समेत रहनुभएका काँग्रेस उपसभापति माननीय धनराज गुरुङ्गले संसदभित्र नारा लगाइरहेका बेला एमाले सांसद केपी ओलीबाट भएको अस्वाभाविक व्यवहार निन्दनीय छ । संसदमा रुलिङ सभामुखले गर्ने हो, सत्तारुढ दलले होइन् भन्ने सामान्य मर्यादा नभुल्न पनि नेपाल विद्यार्थी संघ सत्तारुढ दललाई चेतावनी दिन चाहन्छ’, विज्ञप्तिमा उल्लेख छ । 

नेविसंघले काँग्रेसले उठाइरहेको सहकारी ठगी र गिरीबन्धु टी–स्टेटसँग जोडिएको जग्गा प्रकरणको अनुसन्धानलाई प्रभावित पार्ने र सत्ताको बलमा दोषी उम्काउने खेल भएमा सशक्त आन्दोलन गर्ने चेतावनी दिएको छ । 

कांग्रेसले सहकारी ठगी प्रकरणमा गृहमन्त्री रवि लामिछानेमाथि छानबिन गर्न संसदीय समिति बनाउनुपर्ने माग गर्दै निरन्तर सदन अवरोध गरिरहेको छ । सोही क्रममा हिजो कांग्रेस र एमालेका सांसदहरु भिडन्तमा उत्रिएका थिए ।