पाँच महिने छोरोको घाँटी थिच्ने निर्दयी आमा १० महिनापछि पक्राउ

पर्सामा पाँच महिने छोरोको हत्या अभियोगमा आमा पक्राउ परेकी छन् । वीरगञ्ज महानगरपालिका १७ की २२ वर्षीया आरती कुमारीलाई छोरो मारेको अभियोगमा प्रहरीले नियन्त्रणमा लिएको छ । 

उनले गत वर्ष साउन २८ गते घरमा पाँच महिने छोरोको घाँटी थिचेर हत्या गरेकी थिइन् । त्यसलगत्तै उनी भागेर भारतको सिंहपुरस्थित हरैयाग्राममा बस्दै आएको प्रहरीको अनुसन्धानबाट खुलेको छ । 

पर्सा जिल्ला अदालतले गत कात्तिक १९ गते आरतीविरुद्ध ज्यान कसुरको मुद्दामा पक्राउ पुर्जी जारी गरे पनि भारतमा रहेको कारण उनी पक्राउ परेकी थिइनन् । केही दिनअघि नेपाल आएको विशेष सूचनाको आधारमा पक्राउ गरिएको जिल्ला प्रहरी कार्यालय पर्साले जनाएको छ । 

उनलाई नियन्त्रणमा लिएर कारबाही प्रक्रिया अघि बढाइएको जानकारी दिइएको छ ।