पर्यटकलाई सताउनेहरु प्रहरी नियन्त्रणमा

पोखरामा पर्यटकहरुलाई हैरान पारेको आरोप लागेका सात जनालाई प्रहरीले पक्रेको छ । पोखरा महानगरपालिका–९, स्थित पृथ्वीचोक बसपार्क एरियामा आन्तरिक तथा वाह्य पर्यटकलाई दुःख, हैरानी दिएको आरोपमा उनीहरुलाई प्रहरीले नियन्त्रणमा लिएको हो । 

पोखरा महानगरपालिका–४, का ३८ वर्षीय यमबहादुर विक, वडा नम्बर ९, का २८ वर्षीय सागर क्षेत्री, २९ वर्षीय विक्रम सुनार, २४ वर्षीय अर्जुन सेन्चिरी, २० वर्षीय लक्ष्मण सिंह, वडा नम्बर ७, का २२ वर्षीय विकास श्रेष्ठ र वडा नम्बर २६, बस्ने २८ वर्षीय साजन परियार पक्राउ परेका छन् । 

उनीहरुले पर्यटकहरुलाई आफु अनुकूल होटल तथा बसमा लैजान झोला तान्ने, पैसाको अनावश्यक मोलमोलाई गर्ने, लागूऔषध सेवन गरी होहल्ला गर्नेजस्ता कार्य गर्ने गरेको प्रहरीको आरोप छ । वडा प्रहरी कार्यालय बैदाम तथा अस्थायी प्रहरी बिट पृथ्वीचोकबाट खटिएको टोलीले हिजो उनीहरुलाई नियन्त्रणमा लिएको हो ।

उनीहरु उपर सार्वजनिक हित, स्वास्थ्य, सुरक्षा, सुविधा र नैतिकताविरुद्धको कसुरमा सम्बन्धित अदालतबाट सात दिनको म्याद थप गरी आवश्यक अनुसन्धान भइरहेको जनाइएको छ ।