‘पैसा देखेपछि महादेवको पनि तीन नेत्र’

नेपालीमा एउटा उखान छ, ‘पैसा देखेपछि महादेवको पनि तीन नेत्र ।’ यसको अर्थ पैसाको अगाडि धेरैले मन थाम्न सक्दैनन् । यस्ताले मठ मन्दिरका दानपेटिकामा समेत नजर लगाएको पाइन्छ ।

भगवानको मन्दिरमा दर्शन गर्न आउने भक्तजनले श्रद्धापूर्वक चढाएको दान चोरी भएको सुन्दा सबैलाई खिन्न लाग्नु स्वाभाविक हो । त्यसमा पनि मन्दिर संरक्षणमा संलग्न सरकारी कर्मचारी र पदाधिकारी नै त्यसको मतियार बनेपछि कस्तो आश गर्ने ?

पछिल्लो समय मन्दिरको दानपेटिकामा चढाएको रकम मन्दिर संरक्षणका लागि खडा गरिएको कार्यालयका पदाधिकारी, कर्मचारी र पूजारीकै मिलेमतोमा चोरी हुने गरेको खबर यसअघि पनि सुनिएको थियो । तर, राजधानी काठमाडौंमा रहेको विश्व सम्पदासूचीमा सूचीकृत पशुपतिनाथ मन्दिरमा भएको भेटी चोरीको विषयले सबैलाई झस्काइदिएको छ । 

ऐतिहासिक, धार्मिक एवम् पर्यटकीय दृष्टिले निकै महत्वपूर्ण स्थलबाट दिनदहाडै भेटी चोरी हुने गरेको विषयले सर्वत्र चर्चा पाएको छ । मन्दिरको सुरक्षा र संरक्षणका लागि खडा गरिएको पशुपति क्षेत्र विकास कोषका पदाधिकारीकै सल्लाहमा कर्मचारीले भेटी चोरेको रहस्योद्घाटन भएको छ । 

दैनिक तीनदेखि साढे तीन लाख रुपैयाँ भेटीस्वरुप संकलन हुने गरेको पशुपतिनाथ मन्दिरमा कोषले केही समयदेखि निगरानी बढाएको बताइन्छ । त्यसपछि सिसीटिभी क्यामेरा पनि जडान गरियो ।

तर, भेटी गणनाका क्रममा हिजो शंकास्पद गतिविधि देखिएपछि कोषले प्रहरीलाई खबर गरेको हो । महानगरीय प्रहरी वृत्त, गौशालाले उनीहरुलाई  नगद गन्दै गर्दा पक्राउ गरेको बताइन्छ । कोषका प्रवक्ता रेवतीरमण अधिकारीले भेटी गनिरहेका सबै आठै जनालाई पक्राउ गरिएको जानकारी दिए । 

‘यो विषयमा कोषले अहिले धेरै बोल्न मिल्दैन । हामीलाई भेटी चोरी हुने शंका लागिरहेको थियो । हिजो भेटी गन्ने क्रममा शंकास्पद गतिविधि देखेपछि प्रहरीलाई खबर गरिएको हो । आठ जना गन्दागन्दै पक्राउ परे । अनुसन्धानको क्रममा को दोषी भन्ने खुल्छ । हाम्रो भनाइ दोषी उम्किनुहुँदैन र निर्दोष फस्नुहुँदैन भन्ने हो’, उनले बताए ।

प्रहरीले कोषका नायवसुब्बा नवराज ढोडारी, मन्दिरका ब्राह्मणहरु नवराज घिमिरे, राम सापकोटा, लक्ष्मण सापकोटा, मन्दिरमा बाजा बजाउने कर्मचारी अनिल परियार, सनिष कपाली र कुमार दमाईलाई नियन्त्रणमा लिएको हो । त्यस्तै, मन्दिर परिसरमा रहेको नेपाल इन्भेष्टमेण्ट मेगा बैंकको रकम संकलन केन्द्रका एक कर्मचारीलाई पनि नियन्त्रणमा लिइएको थियो । 

पक्राउ परेका केही कर्मचारीले उक्त कार्य गराएकोमा कोषाध्यक्ष नारायणप्रसाद सुवेदीको नाम लिएका छन् । सुवेदीले ‘केही हुँदैन, काम गर’ भनेकाले पैसा झिकिएको ती कर्मचारीले प्रहरीको सोधपुछमा बताएका छन् । झण्डै तीन महिनादेखि उक्त धन्दा चलेको उनले प्रहरीसमक्ष बयान दिएका छन् । दैनिक तीन हजारदेखि १५ हजार रुपैयाँसम्म भेटी निकाल्ने गरेको र सो रकम कोषाध्यक्ष सुवेदीदेखि ढोडारी, पूजारी नवराज घिमिरेसम्मलाई भागबण्डा लगाउने गरिएको बयान दिएका छन् ।

सिसीटिभी क्यामेरा राखेपछि ‘आफूले त्यस्तो काम नगर्ने’ भन्दा पनि उनीहरुले नमानेको ती कर्मचारीको भनाइ छ । राष्ट्रिय वाणिज्य बैंकको पूर्वकर्मचारी समेत रहेका सुवेदी २०७८ सालमा कोषको कोषाध्यक्षमा नियुक्त भएका हुन् । पदीय दुरुपयोग गरेर उनले कोषलाई क्षति पुर्याउन खोजेको भन्दै उनीविरुद्ध अख्तियार दुरुपयोग अनुसन्धान आयोगमा उजुरीसमेत परेको थियो । पक्राउ परेकाले सुवेदीले ज्याकेटमा लुकाएर भेटी चोर्न लगाउने गरेको प्रहरीसमक्ष बताएका छन् । 

प्रहरीले यस विषयमा थप अनुसन्धान अघि बढाएको जानकारी दिएको छ । आवश्यक सोधपुछपछि तीन जनालाई हाजिरी जमानीमा रिहा गरिएको छ । बैंकका कर्मचारी र दुई पूजारीलाई रिहा गरिएको प्रहरी वृत्त, गौशालाले जनाएको छ । वृत्तका एक जना अधिकृतका अनुसार ढोडारी, घिमिरे, कपाली, परियार र दमाई भने प्रहरी हिरासतमा छन् । ‘तीन जनालाई हाजिरी जमानीमा रिहा गरिएको छ । बैंक कर्मचारीको साथबाट केही फेला परेन । अन्य दुई जनाबाट पनि केही नभेटिएपछि छाडेका हौं । थप अनुसन्धान भइरहेको छ’, ती अधिकृतले भने । 

उनका अनुसार कोषको तर्फबाट हालसम्म पनि जाहेरी परेको छैन । भन्छन्, ‘कोषबाट जाहेरी आउने क्रममा रहेको बुझिएको छ । त्यसैले मुद्दा चलाइसकेका छैनौं ।’