बाल मन्दिरका तत्कालीन उपाध्यक्ष सिआईबीको नियन्त्रणमा, अरुलाई पक्राउ पुर्जी

काठमाडौंको नक्सालस्थित बाल मन्दिरको जग्गा हिनामिना प्रकरणमा नेपाल बाल संगठनका तत्कालीन उपाध्यक्ष तुलसीनारायण श्रेष्ठ पक्राउ परेका छन् । प्रहरीको केन्द्रीय अनुसन्धान ब्युरो (सिआईबी) ले उनलाई आज नियन्त्रणमा लिएको जनाएको छ ।

सिआईबी प्रवक्ता एसपी होबिन्द्र बोगटीले श्रेष्ठलाई पक्राउ गरिएको जानकारी दिए । २०७२ सालमा बाल मन्दिरका तर्फबाट नेपाल बाल संगठनका तत्कालीन पदाधिकारी र कर्मचारीले सेटिङ मिलाएर बृहस्पति विद्या सदनलाई ५९ वर्षका लागि बाल मन्दिरको २९ रोपनी ४ आना जग्गा सस्तो भाडामा दिई दुरुपयोग गरेको आरोप छ । 

यो प्रकरणमा गत वैशाख २७ गते २० जनापछि पक्राउ पुर्जी जारी भएको थियो । पक्राउ पुर्जी जारी भएको एक महिनापछि श्रेष्ठलाई सिआईबीले नियन्त्रणमा लिएको हो । 

पक्राउ पुर्जी जारी भएका अन्यमा संगठनकी तत्कालिन अध्यक्ष रितासिंह वैद्य, उपाध्यक्ष योगेन्द्रबहादुर शाही, पाँच महासचिव गणेशदत्त श्रेष्ठ, श्यामकुमार आले, सुवासकुमार पोखरेल, प्रचण्डराज प्रधान र रामकाजी कोने, उपमहासचिव सुमन शाक्य, सदस्य एवम् स्रोत तथा परिचालन उपसमिति संयोजक कृष्णबहादुर साह, कोषाध्यक्ष मनोहर गोपाल श्रेष्ठ, उपकोषाध्यक्ष दीपकदास श्रेष्ठ छन् । 

त्यस्तै, बृहस्पति विद्या सदनका तर्फबाट तत्कालीन अध्यक्ष पुरुषोत्तमराज जोशी र चिरञ्जीवी तिवारी, सञ्चालकहरु प्रवीणराज जोशी, मुरारीनिधि तिवारी, श्रद्धा संघाई, अभिनव सिंघानिया, सिद्धार्थ केडिया र कीर्तिप्रसाद पाण्डे छन् ।