नापी सर्वेक्षकको हातमा घुस ३५ हजार, साथमा स्रोत नखुलेको ५० हजार

नापी कार्यालय चन्द्रौटा, कपिलवस्तुका सर्वेक्षक बेचनप्रसाद गुप्ता घुससहित पक्राउ परेका छन् । जग्गा कित्ताकाटको प्रयोजनमा सेवाग्राहीसँग घुस लिएको आरोपमा अख्तियार दुरुपयोग अनुसन्धान आयोगको टोलीले उनलाई नियन्त्रणमा लिएको बताइएको छ ।

आयोगको बुटवलबाट खटिएको टोलीले उनलाई कार्यालय नजिकैबाट सेवाग्राहीसँग ३५ हजार रुपैयाँ घुस लिइसकेको अवस्थामा फेला पारेको हो । उनको साथबाट स्रोत नखुलेको ५० हजार रुपैयाँ पनि बरामद गरिएको जानकारी दिइएको छ । अख्तियारका अनुसार गुप्तामाथि थप अनुसन्धान भइरहेको छ ।