भारतीय प्रधानमन्त्रीको शपथग्रहण समारोह जेलभित्रैबाट हेरे तीन सांसदले

भारतमा हालै सम्पन्न लोकसभा निर्वाचनमा आफ्नो दल सम्मिलित गठबन्धनले बहुमत ल्याएपछि नरेन्द्र मोदीले तेस्रो कार्यकालका लागि प्रधानमन्त्री पदको शपथग्रहण गरिसकेका छन् । यसअघि दुईपटक एक्लै बहुमत ल्याएको भारतीय जनता पार्टी ‘भाजपा’ लाई भारतीय मतदाताले यसपटक गठबन्धनमा बाँधिन बाध्य पारे ।

पहिले सन् २०१४ र दोस्रो पटक २०१९ मा प्रधानमन्त्री बनेका मोदीले पहिलो पटक गठबन्धन सरकारको अनुभव गर्दैछन् । यो पनि अन्तर्राष्ट्रियस्तरमा चर्चाको विषय बनेको छ । यस पटकको निर्वाचनमा भारतीय राष्ट्रिय काँग्रेसले उल्लेखनीय प्रगति गरेको छ । ९९ सीटमा जीत हासिल गरेर काँग्रेस दोस्रो ठूलो दल बनेको छ । 

लोकसभामा यस पटक धेरै नयाँ अनुहार पुगेका छन् । ठूला र नाम चलेका नेतालाई हराएर जेल जीवन बिताइरहेकाहरु समेत निर्वाचित भएका छन् । जेलभित्रैबाट उम्मेदवारी दिएकाहरुलाई भारतीय जनताले अत्यधिक मतले जिताएका हुन् । तीमध्ये तीन अनुहार अहिले सबैभन्दा बढी चर्चामा छन् ।

उनीहरुको जीतपछि भारतीय सञ्चारमाध्यमहरुले लोकतन्त्रको ‘हार’ भएको टिप्पणी गरिरहेका छन् ।

मुख्यमन्त्रीको जिम्मेवारी निर्वाह गरिसकेका नेतालाई हराएर जेलमा सजाय भुक्तान गरिरहेका एक इञ्जिनियर विजयी भएका छन् । तिहाड जेलमा रहेका शेख अब्दुल रसिदले जम्मु–कश्मिरका पूर्वमुख्यमन्त्री ओमार अब्दुल्लाहलाई पराजयको स्वाद चखाएका हुन् । 

मुलुकको गम्भीर सूचना चुहाएको र आतंकवादीहरुलाई आर्थिक सहयोगसँगै गैरकानुनी गतिविधि गरेको आरोप लागेका उनी सन् २०१९ मा जेल चलान भएका थिए । स्वतन्त्र उम्मेदवारी दिएका उनको जेलबाटै चुनावी अभियान जोडतोडका साथ चल्यो । छोराहरुले चुनावी अभियान चलाए । रसिदले बारामुल्ला क्षेत्रमा आफ्ना प्रतिद्वन्द्वीभन्दा एक लाख मत बढी पाए । 

पञ्जाबको खादुर साहिब लोकसभा सीटबाट स्वतन्त्र उम्मेदवार बनेका अमृतपाल सिंह पनि यस पटक विजयी भएका छन् । खालिस्तानी समर्थक एवम् संदिग्ध आतंककारीको रुपमा परिचित उनी अहिले असामको जेलमा छन् । जेलभित्रैबाट चुनाव लडेका उनले ‘आइपिएस’ को जागिर छोडेर राजनीतिमा आएकालाई हराएका हुन् । उनले आफ्ना प्रतिद्वन्द्वीलाई झण्डै दुई लाख मतान्तरले हराए । 

त्यस्तै, पूर्वप्रधानमन्त्री इन्दिरा गान्धीको अंगरक्षक रहेका बेअन्त सिंहका छोरा सरबजीत सिंह खाल्सा पनि लोकसभामा निर्वाचित भएका छन् । गान्धीको हत्याको आरोपमा पञ्जाबको फरिदकोट अदालतबाट सजाय सुनाइएका उनले आफ्नो प्रतिद्वन्द्वीलाई झण्डै ७० हजार मतान्तरले हराएका हुन् । उनीहरुको जीतपछि भारतीय सञ्चारमाध्यमहरुले लोकतन्त्रको ‘हार’ भएको टिप्पणी गरिरहेका छन् ।