नदीजन्य पदार्थ चोरीमा प्रयोग भएका टिप्पर समातिए

कास्की प्रहरीले अवैध रुपमा नदीजन्य पदार्थको उत्खनन् तथा चोरी निकासीमा प्रयोग भएका दुई वटा सवारी साधन नियन्त्रणमा लिएको छ । जिल्ला प्रहरी कार्यालय, कास्कीमातहत सिआरभी लामाचौर र अस्थायी प्रहरी पोष्ट हेम्जाबाट खटिएको टोलीले ती टिप्पर नियन्त्रणमा लिएको हो । 

पोखरा महानगरपालिका १९,करायाचौतारास्थित सडकखण्डमा सवारी चेकजाँचको क्रममा भुजुङखोलाबाट आउँदै गरेको ग. १ क ५२४८ नम्बरको मिनी टिप्परमा कटपिस ढुङ्गा भेटिएको जिप्रकाका सूचना अधिकारी प्रहरी नायव उपरीक्षक (डिएसपी) वसन्तकुमार शर्माले बताए । 

उक्त टिप्परलाई आवश्यक कारबाहीका लागि अन्नपूर्ण संरक्षण क्षेत्र सम्पर्क कार्यालय,हरियोखर्क पठाइएको उनले जानकारी दिए । टोलीले वडा नम्बर २५, हेम्जास्थित पोखरा–बाग्लुङ सडकखण्डमा घट्टेखोलाबाट पोखरातर्फ आउँदै गरेको ग. १ क ५५९३ नम्बरको टिप्पर रोकेर चेकजाँच गरेको थियो ।
 
त्यस टिप्परमा कागजात नभएको छपनी ढुङ्गा फेला परेको हो । प्रहरीले आवश्यक कारबाहीका लागि बरामद ढुङ्गासहित टिप्पर पोखरा महानगरपालिकाको कार्यालय पठाएको छ ।