भ्रष्टाचारको आरोपमा तानिए अर्का ठूला चिनियाँ नेता
![भ्रष्टाचारको आरोपमा तानिए अर्का ठूला चिनियाँ नेता](https://janaaastha.prixacdn.net/media/albums/441970463_1513735899179465_1053106843213768944_n_Jjho48tOng.jpg)
राष्ट्रपति सि चिनफिङको भ्रष्टाचारमा ‘शून्य सहनशीलता’ को नीति कार्यान्वयन क्रममा अर्का नेतामाथि कारबाही थालिएको छ।
चिनियाँ राजनीतिक परामर्श दातृ सम्मेलन स्थायी समिति सदस्य तथा संस्कृति, इतिहास र अध्ययन समितिका निर्देशक वु यिङ्चेमाथि हिजो पक्राउ गरेर अनुसन्धान अघि बढाएको जनाइएको छ ।
प्रचलित कानुन र अनुशासनको गम्भीर उल्लंघन गरिएको उल्लेख गर्दै चिनियाँ कम्युनिष्ट पार्टी केन्द्रीय अनुशासन आयोगको अनुगमन तथा सुपरीवेक्षण कमिटीले वुमाथि अनुसन्धान थालिएको जनाएको छ । सान्तोङ प्रान्तका ६८ वर्षे उनी पार्टीको विभिन्न जिम्मेवारी पूरा गर्ने क्रममा धेरै वर्षदेखि तिब्बतमा थिए।
"सन् २०१९ अक्टोबर १२ मा चिनियाँ राष्ट्रपति सि नेपाल आउँदा उनी पनि भ्रमण दलमा थिए । "
विगतमा तिब्बत स्वायत्त क्षेत्रीय सरकारको उपाध्यक्ष, पार्टी क्षेत्रीय कमिटी स्थायी समिति सदस्य,प्रोपोगण्डा विभागको निर्देशक,तिब्बत सरकारको कार्यकारी उपाध्यक्ष,कम्युनिष्ट पार्टीको क्षेत्रीय कमिटीमा उपसचिव तथा कार्यकारी उपसचिवको जिम्मेवारीमा थिए । सन् २०१६ देखि २०२१ सम्म वु तिब्बत पार्टी कमिटीको सचिवसँगै १३ औं राष्ट्रिय चिनियाँ कँग्रेसको शिक्षा, विज्ञान,संस्कृति र स्वास्थ्य समितिको उपाध्यक्ष बनेका थिए ।
अघिल्लो वर्षको मार्चदेखि १४ औं सम्मेलनले उनलाई चिनियाँ जनराजनीतिक परामर्शदातृ सम्मेलनको स्थायी समिति सदस्य तथा संस्कृति,इतिहास र अध्ययन समिति निर्देशकको जिम्मेवारी दिएको थियो । सन् २०१९ मा चिनियाँ राष्ट्रपति सि नेपाल भ्रमणमा आउँदा उनी पनि उच्चस्तरीय टोलीको सदस्य थिए ।
यतिखेर चिनियाँ जनराजनीतिक परामर्शदातृ सम्मेलनका एकजना उपाध्यक्ष बाटेर नेपाल भ्रमणमा हुनुहुन्छ । उता सोही सम्मेलनका एक जना सदस्य तथा ठूला नेता भ्रष्टाचार तथा अनुशासनहीन काम गरेको आरोपमा पक्राउ परेका छन् ।
टिप्पणीहरू