पूर्वपतिको घरमा ताल्चा लगाउन पुगेकी मीना ढकाल पक्राउ

हाँस्य कलाकार मनोज गजुरेलकी पूर्वपत्नी मीना ढकाल पक्राउ परेकी छन् । आज बिहान भक्तपुरको बाल्कोटस्थित गजुरेलको घरमा ताल्चा लगाउन पुगेकी उनलाई प्रहरीले सोही स्थानबाट नियन्त्रणमा लिएको हो । 

ढकाललाई साइबर क्राइमको आरोपमा पक्राउ गरेकाे भक्तपुर प्रहरी परिसरले जनाएको छ । उनले आज बिहान गजुरेलको घरमा पुगेर तोडफोड गर्नुको साथै ढोकामा तालासमेत लगाएको परिसरका डिएसपी राजन कार्कीले जानकारी दिए ।

‘उहाँ (मीना)लाई साइबर क्राइमको कसुरको पक्राउ गरेका छौ । आज बिहान बाल्कोट गएर पूर्वपतिको घरमा तोडफोड गर्ने, ताला लगाउने काम पनि गर्नुभएछ’, उनले भने ।   

कलाकार गजुरेल र ढकालले २२ वर्षे लामो वैवाहिक सम्बन्धलाई पूर्णविराम दिंदै ०७४ सालमा डिभोर्स गरेका थिए । त्यसयता ढकालले समाजिक सञ्जालबाट गजुरेलमाथि अनेक आक्षेप लगाउँदै आएकी छन् ।