प्रहरीको लेखापाल सरुवामा पनि छाडेन गृहले,विशेष ब्युरोका डिआइजी फिर्ता

नेपाल प्रहरीले हिजो गरेको झण्डै तीन सय लेखापाल (एकाउण्टेण्ट) को काज सरुवा विवादमा परेको छ । प्रहरी प्रधान कार्यालय,नक्सालले गरेको भनिएको २८९ जना लेखापालको सरुवामा गृह मन्त्रालय हावी भएको आरोप लागेको छ ।

प्रहरी हेडक्वार्टरको मानवस्रोत विकास विभाग,कर्मचारी प्रशासन शाखाले उनीहरुको सरुवा भएको परिपत्र जारी गरेको हो । काज सरुवा अर्थात् अर्को आदेश नभएसम्म लेखाप्रमुखको रुपमा कामकाजमा खटाइएको परिपत्रमा उल्लेख  छ । 

सामान्यतयाः असई,सई,वरिष्ठ सई,केही इन्सपेक्टर कार्यरत हुने लेखामा उच्च तहका कर्मचारीको मात्रै सरुवा गर्ने मन्त्रालयले आँखा लगाएपछि चर्को आलोचना भएको बताइन्छ । जबकि एसपीसम्मको सरुवा आइजीपी स्वयमले गर्नुपर्ने कानुनी व्यवस्था छ । ‘लोकतन्त्र र सुशासनमा प्रतिबद्ध र कानुनविज्ञ मन्त्रीले नेतृत्व गरेको बेलामा समेत गृहले लेखापालको सरुवामा हात हाल्न त नपर्ने हो !’ गृहकै एकजना कनिष्ठ अधिकृतले भने ।

हिजो राति अबेर निस्किएको एकाउन्टेण्टहरुको सरुवामा काज उल्लेख गरिनुलाई पनि उनले आपत्ति जनाएका छन् । काज सरुवा सामान्यतयाः एकाध कर्मचारीलाई विशेष प्रयोजनमा खटाइने प्रशासनिक भाषा हो । तर,झण्डै तीन सयको सरुवालाई काज भन्न नमिल्ने ती अधिकृतको दाबी छ । ‘एकाउन्टेन्टजति सबैलाई यताबाट उता लगिएको छ । त्यो पनि काज हुन्छ ?,’ उनले भने ।
 
नयाँ मन्त्री र उनको समूहले यसबाट राजनीतिक वैतरणी तर्न खोजेको आरोप पनि लागेको छ । तत्कालीन प्रहरी महानिरीक्षक शैलेश थापाको पालामा दुई वर्षसम्म लेखापाल सरुवा भएको थिए । तर,आईजीपीको जिम्मेवारीको काम पनि सिंहदरबारबाटै हुन थालेपछि नक्सालबाट कम्प्युटर प्रिन्ट मात्रै हुने भएकाले प्रहरी संगठनका प्रमुखलाई जिम्मेवार बनाउन राजनीतिक नेतृत्व नै चुक्ने गरेको पछिल्लो घटनाले पनि पुष्टि गरेको बताइन्छ । 

हेडक्वार्टरको लेखामा डिएसपी वीरेन्द्र गोदार छन् । उनका कमाण्डर डिआइजी केदार ढकाल हुन् । ढकाल सहकारी अध्यक्ष ओमदेवी मल्लका श्रीमान् हुन् । नेपाली काँग्रेसप्रति नरम देखिएका ढकाललाई प्रयोग गरेर गृह मन्त्रालयले तीन सय एकाउण्टेण्टको सरुवा गरेको एकथरीको आरोप छ । स्रोत भन्छ, ‘मन्त्रीका ४० जना राख्दा आफ्नो २० जना राखेर कसले दुनो सोझ्याएन होला र ?’

यसअघि प्रधान कार्यालयले हरेक असार मसान्तभित्र लेखापालहरुको सरुवा गर्थ्यो । जसमा एउटा कार्यालयमा दुई वर्ष लेखापाल भएकाहरुको असार मसान्तमा सरुवा गर्ने चलन छ । 

आर्थिक वर्षको प्रारम्भमा सबै कार्यालय तथा युनिटमा नयाँ आर्थिक वर्षको बजेट पठाइने भएकाले धेरै बजेट हुने कार्यलयमा जान र पठाउन लेखापाल तथा ठूलाबडाहरुबीच अस्वस्थ प्रतिस्पर्धा हुने गरेको विगत देखिएको थियो ।

प्रहरी स्रोतका अनुसार नेपाली काँग्रेस र एमालेबीच गत असार १७ गते नयाँ सरकार गठनको सहमति र लगत्तै बनेको नयाँ सरकारका कारण लेखापाल सरुवाको गृहकार्य रोकेको थियो ।

असार ३१ गते रमेश लेखक गृहमन्त्री बनेपछि हिजो राति उनीहरुको सरुवा भएको हो ।यसवीच गृहले विशेष ब्युरो प्रमुख डा.मनोज केसीलाई तानेर एकेडेमी पुर्याई राजन अधिकारीसङ्ग जिम्मेवारी साटफेर गराएको छ ।