अब यताउता हुने गुप्तचरको पालो

सत्ता साझेदार नेपाली कांग्रेसलाई समेत खासै भाउ नदिई प्रधानमन्त्रीको तजबिजमा २१ जना सचिव सरुवा गरेको सरकारले अब गुप्तचरका डिआइजी हेरफेरको तयारी थालेको छ । प्रदेश प्रमुखको रुपमा रहेका सातै क्षेत्रका डिआइजीहरु फेरबदल गर्न लागिएको हो । 

उच्च जानकार स्रोतका अनुसार राष्ट्रिय अनुसन्धान विभागले डिआइजी सरुवाको सिफारिस दुई दिनअघि नै प्रधानमन्त्री कार्यालय पठाइसकेको छ । जसमा कोशी प्रदेशका किशोर श्रेष्ठलाई सुदूरपश्चिम पठाउन प्रस्ताव गरिएको छ । 

उनले गण्डकी वा लुम्बिनीमध्ये एक ठाउँमा जान इच्छा देखाएका थिए । तर, यसअघि डडेल्धुरा र बैतडी बसेका उनलाई फेरि उतै धपाइन लागिएको हो । श्रेष्ठको ठाउँमा सुदूरपश्चिमका इन्द्र लामालाई ल्याउन सिफारिस गरिएको छ । 

मधेस प्रदेशका सञ्जय यादव बागमती सरुवा हुँदैछन् । बागमतीका रामप्रसाद दासलाई लुम्बिनी पठाउने तयारी छ । द्वन्द्वताका आफ्नै अफिस बारामा गोइतमार्फत बम पड्काउन लगाएको आरोप लागेका दासले रोजेरै दाङ जाने मौका पाएको बताइन्छ । 

यता,लुम्बिनीका ओम खड्कालाई कर्णाली पठाएर त्यहाँका माधव तिमल्सिनालाई मधेश झार्ने तयारी छ । गुप्तचर प्रमुख हुतराज थापाको भित्रिया भनेर चिनिने प्रजेश सिंह हमाललाई गण्डकी प्रदेशमा सरुवा गर्न लागिएको छ । मदिराले मातेको फोटो सामाजिक सञ्जालमा हालेर विवादमा परेका उनको रुचिअनुसार हुतराजले पोखरा पठाउन सिफारिस गरेको उच्च स्रोत बताउँछ । 

दुइ दिनअघि प्रधानमन्त्री कार्यालय पुगेको सरुवासम्बन्धी फाइल केही दिनमै सदर गरी भदौबाट डिआइजीहरुलाई नयाँ कार्यक्षेत्रमा खटाइने सम्भावना छ ।