नागरिक उड्डयन प्राधिकरणको समाचार प्रकाशनपछि पत्रकारलाई ज्यान मार्ने धम्की

प्रकाशित समाचारबारे पत्रकारलाई ज्यान मार्ने धम्की दिएकोमा नेपाल पत्रकार महासंघले गम्भीर ध्यानाकर्षण भएको जनाएको छ । नेपाल ग्राउण्ड जिरो डटकममा कार्यरत सुभक महतोलाई अज्ञात व्यक्तिले फोनमा गालीगलौज गर्दै ज्यान मार्ने धम्की दिएको महासंघले जनाएको छ । 

पोखरा क्षेत्रीय अन्तर्राष्ट्रिय विमानस्थल निर्माण र नेपाल नागरिक उड्डयन प्राधिकरणमा भएको अनियमितताबारे समाचार लेखेपछि यस किसिमको धम्की दिइएको जारी विज्ञप्तिमा उल्लेख छ । 

‘पत्रकार महतोले महासंघमा दिनुभएको निवेदनअनुसार २०८१ साउन २६ गते शनिबार बिहान १०ः४९ बजे र आइतबार बिहान ११ः०१ बजे १ (६७८) ५२३–६५६९ नम्बरको ह्वाट्सएपबाट फोन गरी पोखरा क्षेत्रीय अन्तर्राष्ट्रिय विमानस्थल र नेपाल नागरिक उड्डयन प्राधिकरणका बारेमा समाचार नलेख्न दबाब दिँदै स्तरहीन गालीगलौज गर्दै आफु र आफ्ना परिवारलाई समेत ज्यान मार्ने धम्की दिएको जनाइएको छ,’ महासंघले भनेको छ । 

समाचारप्रति चित्त नबुझे या गुनासो भए त्यसउपर कानूनी उपचारमा जान सकिने अथवा प्रेस काउन्सिलमा उजुरी गर्न सकिने प्रावधान हुँदाहुँदै पनि पत्रकार र उसका परिवार समेतलाई भौतिक कारबाहीको धम्की दिनु अत्यन्त निन्दनीय र प्रेस स्वतन्त्रतामाथिको ज्यादती रहेको महासंघको ठहर छ । 

प्रेस स्वतन्त्रता विरोधी यस किसिमका त्रसित र आतंकित धम्की दिनेको तत्काल पहिचान गरी कानूनी दायरामा ल्याउन माग गर्दै महासंघले पत्रकारलाई सुरक्षित र निर्भिक रुपमा काम गर्ने वातावरण निर्माण गर्न सम्बन्धित निकायको ध्यानाकर्षण गराएको छ ।