सांसदहरु पूर्वराजाका ज्वाईँसँग बयान लिँदै

सहकारी संस्था बचत रकम दुरुपयोग सम्बन्धमा गठित संसदीय छानबिन विशेष समितिले पूर्वराजा ज्ञानेन्द्र शाहका छोरी ज्वाईं राजबहादुर सिंहसँग बयान लिएको छ ।

समस्याग्रस्त सहकारीका सञ्चालकहरुसँगको बयानको क्रममा समितिले आज सुमेरु बचत तथा ऋण सहकारीका सेयरहोल्डर सिंहलाई बयानको निम्ति बोलाएको हो । उनी हालैमात्र उक्त संस्थामा लगानीकर्ताको रुपमा भित्रिएका हुन् । 

समिति सदस्यहरुले हिजो सोही संस्थाका पूर्वअध्यक्ष हेमराज दाहाल, अध्यक्ष कृष्णप्रसाद कँडेल र सञ्चालक विदेन्द्र महर्जनसँग विभिन्न जिज्ञासा राखेका थिए । बयानका लागि पुगेका दाहाल, कँडेल, महर्जनलगायतले संस्थापक अध्यक्ष भरत महर्जन रकम हिनामिना गरेर बेलायत फरार भएकाले केही समस्या देखिएको उल्लेख गरेका छन् । 

समितिले हालसम्म समस्याग्रस्त सहकारीका ११ जना सञ्चालकसँग सोधपुछ गरिसकेको छ ।