बागमतीमा दुई दिन बिदा

जनैपूर्णिमा तथा रक्षाबन्धन पर्वको अवसरमा भोलि सरकारले देशभर सार्वजनिक बिदा दिएको छ । 

संघीय सरकारद्धारा यसअघि नै प्रकाशित राजपत्रमा भद्रौ ३ गते रक्षाबन्धनको बिदा हुने उल्लेख छ । मंगलबार गाइजात्रा पर्वको उपलक्ष्यमा बागमती प्रदेश सरकारले पनि सार्वजनिक बिदा दिने निर्णय गरेको छ । 

प्रदेशको आन्तरिक मामिला तथा कानून मन्त्रालयले सूचना प्रकाशित गर्दै त्यसदिन प्रदेशभर बिदा हुने बताएको हो । 

‘बागमती प्रदेश सरकार, मन्त्रिपरिषद्को मिति २०८१÷०४÷३२ गतेको बैठकबाट बागमती प्रदेशमा नेवार समुदायले ऐतिहासिक तथा धार्मिक रुपमा मनाइने गाईजात्रा पर्वको उपलक्ष्यमा सम्वत् २०८१ भद्रौ ४ गते मंगलबार प्रदेशभरि सार्वजनिक बिदा दिने निर्णय भएको जानकारी गराइन्छ,’ जारी सूचनामा उल्लेख छ ।