इण्डो प्यासिफिक युद्ध गोष्ठीमा भाग लिएर जर्नेल फिर्ता

अमेरिकाको होनुलुुलु शहरमा आयोजित इण्डो प्यासिफिक युद्ध गोष्ठीमा भाग लिएका जर्नेल सागरबहादुर थापा काठमाडौं आइपुगेका छन् । थापा कतार एअरवेजको उडान नम्बर क्युआर ६५२ मा बिहान पौने ११ बजे अमेरिकाबाट दोहा हुँदै आएका हुन् । 

थापाको नेतृत्वमा दुई सदस्यीय टोली साउन २९ गतेदेखि ३१ गतेसम्म आयोजित युद्ध गोष्ठीमा भाग लिन त्यता गएको थियो । गोष्ठीमा विश्वका २६ मुलुकका सैनिक अधिकृतहरुको सहभागिता थियो । 

आयोजक अमेरिका रहेको कार्यक्रममा नेपाललगायत अष्ट्रेलिया,बंगलादेश,ब्राजिल, क्यानाडा,चिली,कोलम्बिया,फ्रान्स, जर्मनी,हंगेरी,इण्डोनेशिया,इटाली, जापानले भाग लिएका थिए । अन्य मुलुकमा मंगोलिया, नेदरल्याण्ड्स, न्यूजिल्याण्ड, नर्वे, पपुवान्युगिनी, फिलिपिन्स, कोरिया, रोमानिया, सिंगापुर, थाइल्याण्ड, बेलायतको सहभागिता थियो ।