भारतीय उत्तर प्रदेशमन्त्री सपरिवार काठमाडौंमा, प्रहरीको विशेष सुरक्षा

भारतीय उत्तर प्रदेश सरकारका औद्योगिक विकास, निर्यात प्रोत्साहन, एनआरआई तथा लगानी प्रोत्साहनमन्त्री काठमाडौं आएका छन् । परिवारसहित दिउँसो ३ बजे त्रिभुवन अन्तर्राष्ट्रिय विमानस्थलमा आइपुगेका मन्त्री नन्दगोपाल गुप्ता ‘नन्दी’ लाई नेपाल प्रहरीले विशेष सुरक्षासहित एस्कर्टिङ उपलब्ध गराएको छ ।

प्रहरी प्रधान कार्यालय कार्य विभागले हिजो सम्बन्धित कार्यालय,विभाग र युनिटलाई जारी गरेको सर्कुलरमा आज दिउँसो एअर इण्डियाको उडानमा आइपुगेपछि पाहुनालाई भोलि बिहान ११ बजेसम्म उक्त सुरक्षा प्रदान गर्न निर्देशन दिइएको छ । वरिष्ठ उपरीक्षक सिद्धिविक्रम शाहले लेखेको पत्रानुसार सहायक निरीक्षक विकास सिलवाललाई व्यक्तिगत सुरक्षा अधिकृतको रुपमा खटाइएको छ । 

पशुपति दर्शनका लागि आएका अतिथिलाई आवागमन मार्ग, कार्यक्रमस्थल,भ्रमणस्थलमा आउजाउ गर्दा एस्कर्टिङ र आवासमा पनि आवश्यक सुरक्षा प्रदान गर्न हेडक्वार्टरको निर्देशन छ ।

भारतीय प्रदेशमन्त्री भोलि बिहान १० बजे एअर इण्डियाको उडानमा नयाँ दिल्ली फर्कने कार्यक्रम रहेको बुझिएको छ ।