त्यसपछि कोशीका मुख्यमन्त्रीको मन पग्लियो

‘हेर्ने कथा’ को पछिल्लो श्रृंङ्खलाबाट चर्चामा आएका भोजपुरका प्रकाश तामाङ्गको दुःखको कथा हेरेपछि कोशी प्रदेशका मुख्यमन्त्री हिक्मतकुमार कार्कीको मन पग्लिएको छ । प्रदेश सरकारले उनलाई कृषि पेशा गर्न सहयोग गर्ने प्रतिबद्धता जनाएको छ । 

आफ्नो प्रदेशको नागरिकको पीडा हेरेर आफू मर्माहित भएको उल्लेख गर्दै उनले प्रकाशलाई आवश्यक सहयोग गर्न तयार रहेको बताए । उनले भने,‘संघीय सरकारबाट उनलाई नागरिकता दिन पहल भइरहेको छ । नागरिकता प्राप्त गर्नेबित्तिकै प्रदेश सरकारले उनलाई पशुपालन वा कृषि पेशा गर्न सहयोग गर्नेछ । शैक्षिक योग्यता भएको भए सरकारी जागिर दिन सकिन्थ्यो । तर, पढाइ नभएकाले उनको सीपअनुसारको उद्यम गर्न सहयोग गर्ने प्रदेश सरकारको योजना छ ।’

‘हेर्ने कथा’ टिमले प्रकाशलाई गोरखाको चुमभ्यालीमा फेला पारेको थियो । टिमले उनको परिवार पत्ता लगाएर ३५ वर्षपछि पुनःर्मिलन गराइदिएको छ । सानो उमेरमा गलैँचा उद्योगमा काम गर्न काठमाडौं आएका उनलाई एकजना शेर्पाले गोठालो बनाउन चुमभ्याली लगेका थिए ।