आयोगद्वारा पाँचथर विष्फोटको निष्पक्ष छानबिन माग

दुई बालकको ज्यान जानेगरी पाँचथरमा भएको बम विस्फोटको घटनाको सत्यतथ्य छानबिन गर्न राष्ट्रिय मानव अधिकार आयोगले माग गरेको छ । 

हिजो दिउँसो फालेलुङ्ग गाउँपालिका–५ डाँडागाउँस्थित आइतराज केरुङको घरमा बम विष्फोट हुँदा दुई वर्षीया प्रिन्सा साँवा र ११ वर्षीय दिप्सन साँवाको ज्यान गएको छ । घटनामा १० वर्षीय पवन राई र ७ वर्षीय दिपसन राई घाइते छन् । 

उक्त घटनाप्रति गम्भीर ध्यानाकर्षण भएको जनाउँदै आयोगले निष्पक्ष छानबिन गरी दोषीलाई कारबाही गर्न माग गरेको छ । आयोगका प्रवक्ता सहसचिव डा.टीकाराम पोखरेलले आज विज्ञप्ति जारी गर्दै घाइतेको निःशुल्क र प्रभावकारी उपचारसँगै मृतकका परिवारलाई क्षतिपूर्तिको व्यवस्था गर्न सरकारलाई निर्देशन दिएका छन् । 

‘निर्दोष बालबालिकाको ज्यान जानेगरी भएको उक्त घटनाको निष्पक्ष छानबिन गरी दोषीलाई कारबाही गर्न, घाइतेको निःशुल्क र प्रभावकारी उपचारको व्यवस्था मिलाउन, घाइते तथा मृतकका परिवारलाई क्षतिपूर्तिको व्यवस्था गर्न र जथाभावी छोडिएका यस्ता विष्फोटक पदार्थहरु निष्क्रिय पारी पुनः यस प्रकारका घटना दोहोरिन नदिन आयोग सरकारलाई निर्देशन गर्दछ’, विज्ञप्तिमा उल्लेख छ । 

उक्त बम सशस्त्र द्वन्द्वकालमा द्वन्द्वरत पक्षबाट जथाभावी छाडिएका विष्फोटक पदार्थ हुनसक्ने आशंका गरिएको छ । अहिले आयोगको कोशी प्रदेश कार्यालयले घटनाको अनुगमन गरिरहेको छ ।

‘विस्तृत शान्ति सम्झौताको बुँदा नम्बर ५.१.४ मा ‘दुवै पक्ष युद्धको समयमा प्रयोग गरिएका धराप तथा बारुदी सुरुङ्गहरुको रेखाङ्कन, भण्डारण तीस दिनभित्र एक अर्कालाई जानकारी दिने र साठी दिनभित्र निष्क्रिय र निर्मूल गर्न एक अर्कालाई सहयोग गर्नेछन्’ भन्ने उल्लेख गरिएको परिप्रेक्ष्यमा पाँचथरमा भएको विष्फोट द्वन्द्वकालमा द्वन्द्वरत पक्षबाट जथाभावी छाडिएका विष्फोट पदार्थ हुनसक्ने आशंका रहेको छ,’ आयोगले भनेको छ । 

शान्ति सम्झौता भएको अठार वर्ष हुन लाग्दासमेत न्यायको पखाईमा रहेका सशस्त्र द्वन्द्वकालका पीडितहरुले न्याय पाउन नसकेको र आयोगले पटक–पटक विष्फोटक पदार्थ हटाउन र त्यसको प्रगति जानकारी गराउन सिफारिस गरेकोमा विष्फोटको घटनाबाट बालबालिकाले ज्यान गुमाउनुपर्ने अवस्थाको सिर्जना हुनु अत्यन्त दुःखद् रहेको आयोगले बताएको छ । 

केरुङका छोराछोरी र छिमेकी बालबालिकाले घर नजिकैको बारीमा फेला पारेको खिया लागेको वस्तु खेल्ने क्रममा विस्फोट भएको बुझिएको छ ।