सीधा कुराविरुद्धको मुध्दामा फेरि मिति धकेलियो,असोज १० गते बल्ल

सीधा कुरा डटकमविरुद्ध दायर भएको अदालतको अवहेलनासम्बन्धी मुध्दामा अन्तिम फैसला सुनाउने मिति पुनः धकेलिएको छ । सर्वोच्च अदालतको बृहत पूर्ण इजलासको निर्णय सुनाउने पेशी असोज १० गतेका लागि सारिएको हो । 

यसअघि भदौ ६ गतेका लागि तोकिएको पेशी आज बस्नेगरी सारिएको थियो । राष्ट्रिय स्वतन्त्र पार्टी (रास्वपा) का सभापति रवि लामिछाने र जिबी राईको सुनौलो परियोजना ‘ग्यालेक्सी फोर के’ मा प्रसारित सीधा कुरा कार्यक्रमको अनलाइन संस्करण ‘सीधा कुरा डटकम’ ले ‘द डार्क फाइल’ नामक कार्यक्रमबाट एउटा शंकास्पद अडियो सार्वजनिक गरेको थियो । 

‘चार सय बढी भ्रष्टाचारका मुद्दा डिसमिस गराउने सर्वोच्च अदालतका न्यायाधीश सहभागी बैठकको स्टिङ अपरेशन’ शीर्षकको समाचार सामग्रीमा उठाइएको विषयवस्तु कपोलकल्पित र भ्रामक भएको भन्दै सर्वोच्चका सूचना अधिकारी गोविन्दप्रसाद घिमिरेले सर्वोच्चमा अदालतको अवहेलना मुध्दा दायर गरेका थिए ।