कल सेन्टरमा सिआइबीको छापा, विदेशीसहित ५० जना पक्राउ

ललितपुरको एकान्तकुनामा रहेको एक कल सेन्टरमा प्रहरीको केन्द्रीय अनुसन्धान ब्यूरो (सिआइबी)ले छापा हानेको छ । 

केही विदेशीले घर भाडामा लिएर क्रिप्टो कारोबार र ठगी धन्दा गरिरहेको सूचनाको आधारमा गएराति छापा मारेको सिआइबीका प्रवक्ता होविन्द्र बोगटीले जानकारी दिए । उनका अनुसार कार्यालयमा रहेका कागजातसहित ५० जना कर्मचारीलाई नियन्त्रणमा लिइएको छ । 

नियन्त्रणमा लिइएकामध्ये अधिकांश फिलिपिन्स र चिनियाँ नागरिक छन् । ‘तत्कालको लागि कार्यालयसहित त्यहाँ काम गर्ने ५० जनालाई नियन्त्रणमा लिएको छौ’, उनले जनआस्थासँग भने, ‘तीमध्ये क-कसलाई छाड्ने, कारवाहीको लागि कसलाई मुद्धा चलाउने, त्यो अनुसन्धान गर्दैछौ ।’

कल सेन्टरको मुख्य सञ्चालक तीन जना रहेको पनि ब्युरोको प्रारम्भिक अनुसन्धानबाट खुलेको छ ।