यात्रुको सुगर लेभल बढेपछि उड्न लागेको विमान रोकियो

काठमाडौंबाट आज बिहान नयाँ दिल्ली जान ठिक्क परेको भिस्तारा एअरको विमान रन वे पुगेर पुनः पार्किङमा फर्केको छ । १६१ जना यात्रु लिएर उड्न ठिक्क परेको विमानलाई उड्नुभन्दा केही मीनेट अगाडि डाइभर्ट अर्थात फर्काइएको थियो ।

बिहान साढे ११ बजेको भिस्ताराको उडान नम्बर यूके–१५८ मा रहेका एक जना यात्रुले आफ्नो चिनी रोग (सुगर) एक्कासी बढेको बताएपछि विमानलाई फर्काइएको बताइन्छ । त्यसपछि विमानलाई पार्किङमा ल्याएर बिरामीलाई एम्बुलेन्समा राखेर नजिकैको काठमाडौं मेडिकल कलेज अस्पताल पुर्याइएको थियो ।

विमान तोकिएको उडान समयभन्दा करिब ५० मीनेट ढिलो मध्यान्ह १२ बजेर १९ मीनेटमा काठमाडौंबाट नयाँ दिल्ली प्रस्थान गरेको हो । नेकपा माओवादी केन्द्रका महासचिव देव गुरुङ सोही उडानमा नयाँ दिल्ली गएका छन् ।