काँग्रेस सांसदविरुद्ध दुई निकायमा मन्त्रीको उजुरी

संस्कृति, पर्यटन तथा नागरिक उड्डयनमन्त्री तथा नेपाली काँग्रेसका सह–महामन्त्री बद्री पाण्डेले पार्टीका सांसद राजेन्द्र बजगाईंविरुद्ध अनुशासनको कारबाही माग गरेका छन् । आफूविरुद्ध कुप्रचार गरेको जनाउँदै मन्त्री पाण्डेले पार्टी केन्द्रीय अनुशासन समिति र संसदीय दलमा उजुरी दर्ता गराएका हुन् ।

नेपाली काँग्रेसका अनुसार उजुरी अनुशासन समितिमा हिजो र संसदीय दलमा आज दर्ता गराइएको छ । सामाजिक सञ्जालमा आफूविरुद्ध नियमित रुपमा कुप्रचार जारी राखेकाले उजुरी गर्नुपरेको उहाँको भनाई छ । 

आज दर्ता गरिएको उजुरीमा लेखिएको छ, ‘नेपाली काँग्रेसको निर्वाचित माननीय सांसदले पार्टीको आन्तरिक अनुशासन र मेरो व्यक्तिगत इमान र निष्ठामा धावा बोल्ने गरी भए गरेका निराधार आरोपले मेरो व्यक्तिगत भावनामाथि मात्र गम्भीर चोट नपुगी पार्टीको विचार, सिद्धान्त र आदर्शमा समेत आँच पुगेको छ । लोकतन्त्र र विधिको शासनमा यस खाले अवाञ्छित क्रियाकलापलाई कानुनको दायरामा नल्याएसम्म अराजकताले प्रोत्साहन पाई इमान र निष्ठाको उपहास हुनेछ ।’ 

बजगाईंले मन्त्री पाण्डेले भ्रष्टाचार गरेको उल्लेख गर्दै पछिल्लो पटक मंगलबार सामाजिक सञ्जलमा लेखेका थिए । तर मन्त्री पाण्डेले कानूनी प्रक्रिया अपनाउने बनाएपछि उनले २४ घण्टा नबित्दै अधिकांश स्टाटस हटाएका हुन् ।

बजगाईं आफैँ पनि निकै विवादित पर्यटन व्यवसायी हुन् । उनी विदेशमा कालो धन राख्ने ५५ नेपालीको सूचीमा परेको एकथरी काँग्रेसीहरुको आरोप छ । केही समयअघि मदिरा सेवनपछि राजेन्द्र प्राइम टेलिभिजनमा अन्तर्वार्ता दिन गएका थिए । त्यसबेलाको उनको अन्तर्वार्ता भिडियो सामाजिक सञ्जालमा भाइरल भएको थियो ।