जीवन बीमा कम्पनीको सीईओ बन्न खोजेका सबै फेल
राष्ट्रिय जीवन बीमा कम्पनी लिमिटेडको प्रमुख कार्यकारी अधिकृत (सीईओ) का लागि दोस्रो पटक विज्ञापन गरिएको छ । कम्पनीले पहिलोपटक दरखास्त आह्वान गर्दाका सबै उम्मेदवार अनुतीर्ण भएपछि दोस्रो पटक दरखास्त आह्वान गरिएको छ ।
यसअघि कम्पनीले गत असोज १६ गते प्रमुख कार्यकारी अधिकृत नियुक्तिका लागि आवेदन माग गरेको थियो । तर, दरखास्त दिएका उम्मेदवारहरुले न्यूनतम अंक पनि प्राप्त गर्न नसकेको सीईओ नियुक्तिका लागि छनौट तथा सिफारिस समितिले जनाएको छ ।
समितिका अनुसार उम्मेदवारको शैक्षिक योग्यता, अनुभव र व्यवसायिक कार्ययोजना मूल्यांकनमा कुल पूर्णाङ्क ६० प्रतिशतले हुन आउने अंक प्राप्त गर्नेलाई प्रस्तुतीकरण र अन्तरवार्ताका लागि सिफारिस गर्नुपर्ने व्यवस्था छ ।
यद्यपि, कुनै पनि उम्मेदवारले कुल पूर्णाङ्कको ६० प्रतिशत अंक प्राप्त गर्न नसकेको समितिको भनाइ छ । समितिद्वारा आज जारी सूचनामा न्यूनतम शैक्षिक योग्यता र अनुभव हासिल गरेका व्यक्तिलाई आगामी २१ दिनभित्र आवेदन पेश गर्न भनिएको छ ।
जसअनुरुप उम्मेदवारको योग्यता बीमा, व्यवस्थापनलगायत विभिन्न विषयमा कम्तीमा स्नातकोत्तर वा सोसरहको उपाधि हासिल गरी कम्पनीमा व्यवस्थापन तहमा बीमा क्षेत्रमा भए कम्तीमा पाँच वर्ष र आर्थिक क्षेत्रमा भए आठ वर्षको अनुभव हुनुपर्ने छ । त्यस्तै, दुवै क्षेत्रमा भए बीमामा एक वर्षको अनुभवसहित कम्तीमा सात वर्षको अनुभव भएको हुनुपर्छ ।
टिप्पणीहरू