तानसेनमा एकै दिन १२ सय बढि संक्रमित, कतिपय शव अलपत्र

पाल्पाको तानसेन नगरपालिकामा आज बिहान ११ बजेसम्म १२ सय बढिमा कोरोना संक्रमण पुष्टि भएको छ । समुदाय स्तर,दुग्ध व्यवसायी तथा खाद्यान्न र अत्यावश्यक वस्तु बिक्री गर्ने व्यवसायीहरुमा हिजो गरिएको परीक्षणबाट एक दिनमा १ हजार २ सय ६७ जनामा संक्रमण देखिएको नगर प्रमुख अशोककुमार शाहीले बताउनुभएको छ ।

शाहीका अनुसार नगरपालिकाले कन्ट्रयाक ट्रेसिङको काम सकिएलगत्तै समुदायस्तरमा गरेको परीक्षणमा अत्यधिक संक्रमण फेला परेको हो । उहाँका अनुसार पाल्पामा संक्रमणको जोखिम घटेको छैन । पहिले ४० देखि ६० प्रतिशतसम्म संक्रमित रहेको नगरपालिकामा अहिले कम देखिएको उहाँले बताउनुभयो ।

हालसम्म नगरपालिकामा १५ जनाले ज्यान गुमाइसकेका छन् । त्यसैगरी पाल्पाको लुम्बिनी मेडिकल कलेज,प्रभासमा उपचार खर्च तिर्न नसकेका एक जनाको दाहसंस्कार तानसेन नगरपालिकाको पहलमा भएको छ ।

कोरोना संक्रमणपछि गरिएको उपचारमा लागेको खर्च नतिरेसम्म लुम्बिनी मेडिकल कलेज तानसेनले मृतकको शव परिवारलाई दिन नमानेपछि तानसेन नगरपालिकाको जमानीमा परिवारले शव बुझेको हो ।

तर, दाहसंस्कारको समयमा कोही पनि आफन्त र गाउँले मलामी नगएपछि आज बिहान राम्दिघाटमा शवको दाहसंस्कारसमेत नगरपालिकाको पहलमा भएको मेयर शाहीको भनाई छ ।